賭王何鴻燊的四姨太梁安琪，將於下月中宣誓就任保良局總理，但身為保良局前總理的林依麗昨日忽然舉行記者會，公開反對四姨太擔任保良局總理，更厲聲指摘其姨太太身份與保良局「保赤安良」的宗旨不符。
賭王何鴻燊的四姨太梁安琪近年在商場上風頭強勁，今年更投身慈善團體，正式加入保良局成為2005-2006年度保良局總理，下月十二日便會宣誓就職。昨日下午，保良局前總理林依麗卻忽然在佐敦召開記者會，公開反對梁安琪入局，誓要去信給顧問局及發起巿民簽名反對。
不符保赤安良宗旨
林依麗說：「我反對阿四（指四姨太梁安琪）加入保良局，問心啦，咁會畀啲唔好嘅訊息細路仔，即係唔使讀書、搶人老公就有錢，發咗達就用手段去爭取榮譽。你𠵱家叫啲小朋友點諗呀？做人阿二就可以飛黃騰達，香港係一夫一妻制，𠵱家唔係話叫政府拉何鴻燊去坐監，不過咁係會影響細路仔諗嘢。保良局宗旨係『保赤安良』，專門照顧小朋友，你叫阿四有錢就捐去仁濟同博愛呢兩間醫院啦。」
林依麗又指有人靠打麻雀時「鬆章」，博取在社會活動中上位的機會，她更在記者面前致電給其他保良局前總理，爭取眾人支持她的行動，又準備發放一份手寫聲明，但其後她又謂資料出錯要改正而拒發。而保良局方面則表示沒收到林依麗的反對或投訴信件。
多做善事少講無謂嘢
另一方面，昨日四十五歲生日的四姨太與友人在泰國慶祝，她接受長途電話訪問時，得知林依麗指摘她「搶人老公、教壞細路」後，即說：「嘩，咁犀利！我冇回應。」問到四姨太有否靠打麻雀爭取關係時，她笑說：「儍嘅，我鬆踭就識，鬆章就唔識喇！總之，第一，我就完全唔識佢，佢講乜嘢我都莫名其妙；第二，我係依照合法程序做總理，叫佢有乜嘢事咪照應有程序做囉；第三，我出嚟做總理，係做善事，幫助社會有需要嘅人，我由正當途徑賺到正當嘅錢，捐番出嚟，回饋吓社會。」她又表示事件不會動搖她入局的決心，亦不會影響她慶祝生日的心情。
問到四姨太有甚麼生日願望時，她說：「世界和平啦，搵多啲錢，社會唔好咁多動盪是非。大家多啲做善事，少講啲空口嘅無謂嘢。」
採訪：顏英儀、林妙萍
攝影：顏英儀
