二五之爭，愈迫愈出屎！政制事務局局長林瑞麟，突然發表狠話，宣稱香港法治，咁耐都絲毫無損，若然法治受到摧殘，佢會辭職唔撈！
吓？係咪咁英雄呀？去年五月五日，林瑞麟親自書面答覆劉慧卿，話特首若然職位半途出缺，補任嘅係做足五年。
白紙黑字，證據確鑿！經梁愛詩上北京，向中方磕頭，返落來之後，林瑞麟即時回復公公本色，改口認錯！
咁八方想請問林公公：今日之我，打倒昨日之我，佢係咪應該一早就辭職？憲制原則，神聖不可侵犯，豈容噏得出就噏，今日話五年，聽日就兩年？呢份工經已冇乜嘢做，唔使追查淘大花園沙士來源、唔使掃垃圾、唔使大學三改四，政制事務局出晒名清閒，冇嘢做，咁基本嘅嘢都噏錯，林瑞麟搞到形同誤導民意、誤導民主派、亦誤導埋啲土共，係咪應該辭職落台？
大學三改四，特首任期就變咗五改二，憲制大事，咁鬼兒戲，林局長去年五月五日書面答劉慧卿之前，冇請示中央，冇問過當時尚在人間嘅蕭蔚雲，私自二改五，咁就應該辭職！
咁大錯誤，除非佢公開譴責廢董；係廢董有心靠害埋地雷，一早就想辭職，不過唔早講，重話會做到二○○七，有心裝彈弓，搞到林局長當時毫無準備，以為特首職位冇可能半途從缺，於是下巴輕輕衰多口，鑄成大錯！
諗諗吓又係！廢董真係累人累物！就算走都裝定個彈弓畀林公公！去年五月五日，邊個估到廢董會變相炒魷？邊個估得到「港英餘孽」會扶正做特首？見到劉慧卿挑釁，話唔定林局長猜度，就算廢董萬一有乜不測，接任特首嘅係振英哥，振英哥一做，卿姐就會嗌兩年，於是同佢封定後門先！點知世上嘅嘢就係咁大整蠱，帶頭摧毀法治嘅，係唔起訴胡仙嘅梁愛詩，𠵱家又輪到林局長接棒，政制事務局呢個紙板部門應該解散，慳番納稅人血汗錢！
傳真︰2623-9278
電郵︰[email protected]