金像影后妮歌潔曼（NicoleKidman）上周頻頻同利比亞高官個仔、即係著名富商兼利比亞國家足球隊隊長薩迪（Al-SaadiGaddafi）喺澳洲密會。據講薩迪重對妮歌嗒晒糖，想向佢展開銀彈式追求攻勢。不過襄王有心神女無夢，曾經同多個富商拍拖嘅妮歌，似乎對擁有億萬身家嘅薩迪冇乜興趣噃！
據澳洲傳媒報道，著名利比亞花花公子薩迪，上星期同利比亞足球隊訪問澳洲期間，以想投資澳洲電影為名，多次相約妮歌喺澳洲各大著名食肆「傾公事」。據講薩迪一見到妮歌呢位澳洲國寶就大獻殷勤，重諗住以銀彈攻勢俘虜妮歌嘅芳心，並喺上周末一個約會度送上一隻價值千萬嘅鑽石手鈪畀妮歌，當係見面禮。
不過每拍一部片都有二千萬美金（約一億五千六百萬港元）片酬嘅妮歌，見到隻鑽石鈪並不為所動，一口就拒絕咗薩迪嘅美意，為咗令薩迪知難而退，妮歌重以有公事為藉口即時鬆人。一位知情人士話：「薩迪對妮歌即時走人感到好失望，因為妮歌已經表明咗自己嘅立場。」
外間嘅人都好奇怪，點解妮歌會一口拒絕薩迪嘅美意呢？原來早前傳同荷李活著名監製史提夫冰（SteveBing）甩拖嘅妮歌，重未同史提夫冰分手，兩日前史提夫冰重教妮歌打高爾夫球。一位目擊者話：「佢兩個睇嚟不知幾親熱，重不時互摸㖭！」