自由黨主席田少左度右度，心思思去馬參選特首，以田少嘅智慧，應該知道阿爺今次捧邊個，佢硬係唔死心梗係有啲嘢嘅。
有個睇住田少大嘅政壇元老形容，田少今次十足偷糖食嘅細路，想食糖但又驚俾阿爸知道罰打手板，就叫埋細佬民建聯一齊偷食，有乜事都可以壯膽，就算俾人罰打手板，都有人分擔打少幾吓。
元老嘅老友就加把口話，田少耳仔軟，上次23條「三娘教子」發功令佢突然轉軚，今次隨時又係三個女人喺佢身邊𠵱𠵱哦哦，話田少直選都贏過，應該親自出馬，田少聽得多以為真所以決定去馬都唔出奇，咁加上田少有錢有面，仔大女大，住大屋揸靚車，成世人重有乜求呢？都係想為港人做吓嘢，揚吓名啫，若然做得成特首候選人，更加完美啦，冇理由俾煲呔威晒，田少攞一百個提名一定冇問題！
傳真︰2623-9278
電郵︰[email protected]