大市噚日咁跌法，好多之前硬淨嘅股份都跟住跌，好似精電國際（710）企硬喺8.20元配股價附近多時，但隨着市況轉差終於失守，噚日更加跌穿8元，收7.80元，跌3.11％，成交股數222萬股，金額1740萬元。
不過，經紀黃就唔係睇得咁差，佢話早前大股東大幅減持，兼且委任多名新人入董事會，當中包括有財技高手坐鎮，引起精電賣盤疑雲，部份芬佬睇唔通，自然沽貨先，所以精電股價先至跌成咁。
經紀黃又話，實際上隻股並唔係咁差，大股東雖然沽咗好多貨，但並冇話要即時退休，基本因素冇大變。
另外精電即將公布的全年業績，傳聞會靚爆鏡，加上向來無寶不落的金手指，喺大股東減持時，亦以8.20元買入唔少貨，擺明有一定信心。
經紀黃重話，若果夠膽博反彈，可趁弱勢時入市，有一定值搏率，但由於現時市況麻麻，未必可以即食。
慕容小初