如果畀歐洲足協告誣衊球證嘅車路士罪名成立，有機會被取消歐冠盃資格，到時巴塞隆拿就有望以後備身份補上入八強。但係，巴塞教練列卡特卻冇乘人之危，重話單嘢唔關車仔事，要罰嘅話應該罰摩連奴一個。
列卡特雖然俾車仔教練摩連奴屈入球證費斯克更衣室，但重幫車仔講好說話。佢咁話：「只有摩連奴要為呢單嘢負責，根本唔關車仔事，所以佢哋唔應該被踢出歐冠盃。我只係希望啲鍾意亂講嘢嘅人可以從此收口，第日再冇同類事情發生。」
冇錯，列卡特係輸畀摩連奴（巴塞喺十六強兩回合輸四比五畀車仔），教波嘅成就亦唔及對方，但喺呢件事件上表現得咁大方；至於摩連奴，雖則佢大禍臨頭，但鬼死咁牙擦擦，話自己一定會冇事。姑勿論最後判成點，邊個係贏家，邊個係輸家，唔使我求大俠講，相信大家都一目了然。
柏天尼出口術有點低莊
歐洲足協會長選舉○六定○七年舉行重未知，柏天尼就等唔切咁出口術。佢話碧根鮑華○六年之前都會忙住搞德國世界盃，何必出來同佢爭呢？重潤對方大自己十年，有心推動歐洲足運嘅話，十年前做咩唔出來選？真係唔遲唔早，偏偏呢個時候出來爭，柏天尼條氣梗唔順喇！
巴西球星在外心慌慌
喺葡超聯效力嘅巴西球員近排都算當黑，繼波圖法比安奴阿媽喺本月初畀人綁架之後，連士砵亭羅渣里奧阿媽都遭殃，前日喺巴西畀人綁走咗。其實，巴西嘅綁架問題好嚴重，周不時有球星嘅屋企人中招。巴西球星第日簽歐洲球會時，睇嚟要同會方講，簽埋佢哋屋企人至得。
曼聯賴抽籤唔完善
曼聯喺歐冠盃十六強出局，行政總監基爾認為係抽籤制度唔完善嘅結果。佢認為淘汰賽應實行種籽制度，咁就可以避免強隊喺十六強就碰頭，搞到往後嘅戲碼唔夠強。站喺球迷立場來講，我求大俠當然同意基爾嘅睇法，相信好少人會鍾意上屆波圖對摩納哥嘅決賽戲碼啩？
羅賓遜驚牽動神經
效力熱刺嘅英格蘭龍門羅賓遜話最怕有人喺佢面前裸跑。佢話：「一有人裸跑，我就好難集中精神比賽。都唔明點解，我見到有男人裸跑，佢哋重成日走嚟我面前㖭！」如果有個裸男跑嚟羅賓遜身邊，睇怕佢走都走唔切，但若然係女人且樣靚身材正，唔知佢有乜反應呢？