本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如僱主或僱員有任何疑問，可致電勞工處熱線：27171771查詢，此熱線會由「1823政府熱線」職員接聽。
明少：喂！華哥，咁啱呀！近來間廠生意唔錯嘛？
華哥：唉！做生意嘅真難講，本來呢幾個月都有錢賺，點知今個月有間公司拖住條數，話要遲啲至畀；咁啱今個月又買咗部新機，公司盤數猛猛緊，惟有同夥計講，叫佢哋遲啲至出糧啦。
明少：乜咁唔好彩呀！不過你唔好唔出糧畀啲夥計喎。根據《僱傭條例》，工資期完咗之後七日之內就要出糧畀工人㗎喇。如果佢哋喺工資期完咗之後一個月內都收唔到人工，就可以當你炒咗佢㗎喇。佢哋可以隨時走人之餘，重可以追你拎解僱代通知金同其他解僱賠償。你諗諗佢好喎。
華哥：乜𠵱家條例咁嚴！
明少：咁你又要幫啲工人諗吓，人哋一家大細等錢開飯，做咗嘢有糧出都好應份嘅。話時話喇，我好有興趣入股你間廠，你受唔受我玩先？
華哥：哈，你真有眼光，有得傾，有得傾。不過個銀碼起碼要夠畀到人工喎。
明少：無問題，我哋去飲茶再傾。
以上資料只用作說明《僱傭條例》下的相關條文，對有關法例的詮釋，應以《僱傭條例》原文為依據。如有任何爭議，則以法院的判決為最後依歸。
資料提供：勞工處勞資協商促進科
服務熱線
電話：29908288
傳真：23702192
電郵：