為未來設計事業鋪路
古仔拍廣告自度形象

曾獲選香港十大傑出衣着人士的古天樂，早前為其代言三年的服裝品牌拍攝廣告時，獲邀兼任形象指導，古仔表示他稍後準備推出自己設計的服裝系列，今次正好給他機會學習，為未來設計服飾事業鋪路。

連續三年為內地服裝品牌「以純」擔任代言人的古天樂，近日為男裝系列拍攝新一輯廣告照片，古仔今次除充當模特兒外，更兼任服裝指導，相信古仔因為早前獲選十大傑出衣着人士，在衣着打扮方面素有心得，廣告商遂放心將新廣告中的服裝配搭交由古仔自由發揮。

穿衣風格有別
對此古仔說：「呢個可能係原因之一啩，今次影呢輯相，我畀咗好多意見，例如啲衫點襯色同點配搭，廣告商覺得出嚟嘅效果幾好，咪接納我嘅建議囉。其實我之前都提過，話遲啲可能會同呢個品牌合作，推出一系列自己設計嘅服飾，但始終呢個品牌係以內地市場為主，而內地人着衫風格同香港人好唔同，南方同北方人着衫又唔同，好似有啲衫嘅款式係披口，但內地人會覺得係爛，未必接受。

仍是學習階段
「至於香港人着衫鍾意多層次啲，但北方比較凍，對佢哋嚟講，一件褸已經好足夠，所以件褸嘅款式吸唔吸引到佢哋係比較重要，好多嘢我都係喺學習階段。」
古仔又表示，拍廣告當天，原本他想企上紙皮箱做些大動作，但最後因為紙皮箱的邊皮太鋒利，工作人員擔心古仔被𠝹傷而改為坐定定拍照。