睇見圖中咁多人喺度競投，唔好以為係物業拍賣會，或者地皮拍賣，原來啲人只係想投番個單位租住咋！以拍賣方式出租房間，條橋都算新。
天水圍嘉湖海逸酒店，噚日搞月租房間拍賣會，推出三個房，以價高者得方式出租。三個房由四百零五至九百八十五呎，開價五百蚊，每口價五百，結果四百零五呎單人房，以月租六千五成交；五百二十五呎套房，成交價月租九千五；至於九百八十五呎套房，最後由澳洲籍機師，以月租兩萬投得。三個房，租期一個月至一年。呢三個房間，市值月租應係五千九至一萬八千五。
聽講，酒店事前透過直接郵寄方式，寄資料畀附近屋苑住客同租客，總共吸引五十人出席。到七月，酒店會再舉行第二次拍賣會。
投資市場買賣活躍，代理賺佣，肯定好和味，中記為咗催谷員工，努力做「大刁」，之前設立「金鵰獎」，日前喺區經理晚宴上，由集團主席施永青頒發三月份獎項，總共有五個團隊攞到獎，當中四單過億。
黃澤文帶領嘅青山公路組，促成三億元深井海雲軒單位。而黃澤文同潘志明帶領嘅商舖組，做到嘅小欖愛琴灣大刁，總值兩億一。山頂南區同商業部合作促成嘅尖沙嘴力寶太陽廣場成交，涉資一億三千萬；至於西貢清水灣道328號，約一億三千萬，由匡湖居組促成。
另外，中記話，𠵱家增設「鑽鵰大獎」，眼睛鑲鑽石，卡數以營業額多少釐定，今年底頒獎。
新地趁復活節檔期，花費三百萬，為十二個商場宣傳，其中近六十萬呎嘅大埔超級城，宣傳密度比舊年多三成。
新地租務副總經理馮秀炎話，出租率百分百嘅大埔超級城，○四年收到億四租，較○三年增長一成半。由於個場並非鐵路沿線，冇直接受惠於自由行，唔似得上水新都廣場，續租租金有三成升幅。
佢話，新租約多數以底租或提成釐定租金，較高者為準，提成幅度，一般超過生意額一成半，否則租戶會好大壓力。
鷹君利用復活節零售檔期，實行要令旺角朗豪坊旺上加旺，由今日起，佢個獨一無二嘅數碼天幕投入服務，每晚八、九同十點，播放片長十分鐘嘅《龍的故事》，以後每日如常，直至另行通告為止。
聽講，呢個天幕播放器材連保養，要七位數字。第日鷹君重會自資拍短片，務求令個場時刻保持新鮮感。
除咗有免費影片睇，呢幾日重會有爵士樂同搖滾樂隊表演助興，消費滿六百，有Snap-Shot限量版相機送，可以即刻着住買咗嘅靚衫影相留念。
較早前一手盤發生代理打鬥事件，香港地產代理專業協會、香港地代理商總會、地產代理聯會、香港專業地顧問商會同新界地產代理商總會，發表聯合聲明。
聲明要求地監局採取妥善措施，確保事件唔會重演；發展商應規管代理，唔好同一時間有大量代理同買家聚集，因為好容易因擠迫或爭客，搞到打鬥；代理行就要加強培訓，對違反守則代理同佢上司加以嚴懲。
另外，地監局話，今日舉行嘅代理資格試，總共有二千二百一十人報名，係五年新高。
電郵地址：[email protected]
