八方噚日講過湯大狀同太太楊蕙蘭Daisy慶祝結婚三十周年，原來湯大狀同Daisy嘅婚姻係由一齊逛書店開始。話說湯大狀讀書時，雖然成日因為要搵食唔上堂，就算上堂都瞓到跌落地，但係讀書就好鬼叻，第一年就攞全級第一名，有個教授重送咗張五百蚊Swindon書券畀湯大狀獎勵佢。
湯大狀咁叻開始引起Daisy嘅注意，咁啱湯大狀又知道Daisy個妹喺中環間Swindon做暑期工，所以就趁機會約Daisy，叫埋佢一齊去書店買書，佢哋兩個就咁樣開始，然後就一齊到𠵱家。
當然佢兩個都係有緣份，因為讀書都好叻嘅湯太本來想讀醫，但係佢阿哥已經入咗醫學院，為免被阿哥監視，佢就改讀法律。
以上係湯狀夫婦嘅老友鄭慕智前晚喺晚宴講嘅版本，應該最接近事實。而今個復活節假期，湯大狀一家三口會去日本度假，敍吓天倫之樂。
傳真︰2623-9278
電郵︰[email protected]