呢個世界真係好邪，所以話日頭唔好講人，夜晚唔好講鬼。
話說卿姐喺何秀蘭等人嘅游說下，準備披甲上陣同煲呔選過，前晚同一眾人等喺跑馬地馬會咖啡室傾大計，諗吓點樣迫煲呔交代，唔經唔覺傾到成十一點鐘。
正當大夥人準備搭𨋢走人之際，𨋢門一打開，竟然見到煲呔同太太喺裏面，真係寃家路窄，兩個有意競逐新的特首嘅人首次正面碰頭，卿姐當然不示弱，走入架𨋢度重笑住向煲呔下戰書，問幾時同佢一齊出席論壇辯論過，搞到煲呔鬼咁尷尬。
原來煲呔前晚去潮州人大集會打個白鴿轉拉票後，就同太太趕返去馬會食晚飯，呢餐飯邊個做東八方唔知，聽講田少同田太都係座上客。
八方問卿姐係咪要等下個月二號會員大會先決定去馬，佢話實情唔使，因為佢可能唔係以前綫個名參選，但係由於前綫一向反對小圈子選舉，所以如果改變策略，都要同會員交代吓。
傳真︰2623-9278
電郵︰[email protected]