小編輯接到讀者電郵問：「邊個叫做楊傳廣？」小編輯叫左丁山答。左丁山問番小編輯：「點解讀者有此一問？」原來《壹週刊》第784期封面故事講董太打不死，壹仔記者於三月十一日上北京，死跟董太，在機艙（商務）訪問咗董太，講到一班富豪突然成為變臉大師之時，董太按捺不住，振臂高呼：「董生重鐵過楊傳廣，我哋係打唔冧嘅！」
左丁山聽小編輯講過原委，按捺不住大笑幾聲。董太畢竟係上一代，老餅人物，講說話冇政治敏感度，難怪好人一個都經常俾人鬧，實在有啲唔抵。如果董生真係身體壯健如牛，勁如鐵人，董太對住記者應該話：「董生重勁過姚明！」或者「勁過劉翔」，或者再古老一啲，「活躍過李寧！」如果係要講到五六十年代，話董生生猛過李富榮得唔得呀？點解要話「董生重鐵過楊傳廣」，搞到冇乜人知佢講乜，兼且政治不正確呢？
楊傳廣係第一個中國人運動員在奧運會攞獎牌嘅「中華民國」選手，佢在一九五六年墨爾本奧運初露頭角，一九六○年羅馬奧運與同學Johnson（台灣譯做強生）爭奪十項運動全能金牌，最後因體力不及黑人，三鐵成績（標槍、鉛球、鐵餅）輸得遠，最後跑千五公尺，強生苦纏，唔畀楊傳廣拋離太遠，卒之贏咗金牌，楊傳廣飲恨得銀牌。到咗一九六四年東京奧運，楊傳廣被捧成大熱門，但因已經年近三十，負上中國第一人奪奧運金牌之心理重擔，再次落敗。當年楊傳廣有十項鐵人之稱，佢大過董生三兩年，相信船王董浩雲與兒女建華、建成、建平都曾落力為楊傳廣打氣，故此董太印象甚深，至今仍然以楊傳廣為健康象徵。但今時今日，人人講中華人民共和國，唔講中華民國，講健康象徵梗係言必姚明、劉翔，先至夠update啦。