由於大市觀望美國會唔會加息，所以噚日港股交投相當淡靜。
小初唔明咁嘅市況，思捷（330）大股東又可以成功批舊股，重係成40幾億銀咁多，聽講重係好快就批完，小初真係要講一聲服字。
有樣嘢好奇怪，就係思捷噚日沽空金額有成5000萬銀，唔通有春江鴨收到風可以低價補倉，所以借定貨嚟沽空？
思捷噚日微升0.44％，收56.50元，成交金額1.72億元，當中有一大截就係來自沽空，都咪話無啟示。
不過，同人唔同命，前日停牌搞批股的美聯物業（1200），聽聞最終批股的金額，由之前傳聞的4億銀，落實到唔夠2億銀，實在令人懷疑係反應一般之故。
經紀黃就話，雖然本港地產市道好咗好多，而美聯業績又靚爆鏡，但公司持有現金唔少，無端端集資都唔知為乜，況且美聯股價累積升幅巨大，高位接貨者難免有戒心，可能因此先至有咁嘅反應。
如無意外，美聯將於今日復牌，真係唔知會係乜嘢光景？
慕容小初