「七人欖球世界盃」震撼國際，外國人紛紛到香港觀賽，好多大型商業機構乘機邀請貴賓到包廂，拉關係，希望多做生意，冇人邀請嘅個人自由行遊客，就要自己撲飛咯。
上到陸羽，鬼佬R有鬼佬老友在座，就係每年特登嚟香港睇七人欖球賽嘅，問佢如何買到飛，佢指住鬼佬R話：「呢位老友最有辦法！」鬼佬R拎一叠飛出嚟一睇，嘩，有廿幾三十張，每張（三日票）價值一千元，總值成兩三萬。鬼佬R話：「起碼值五萬，不過全部已有老友要晒，一齊去玩到癲，我唔會做黃牛黨嘅！」
鬼佬R舊年到倫敦，順便睇番場波，就係阿仙奴主場對富咸，一張二十鎊嘅門票，鬼佬R向黃牛黨以五十鎊買入，幾位日本遊客嫌貴，唔肯買。開波後約十五分鐘，鬼佬R見到幾位日本客入場，座位比自己低二十行，位置更好。再過幾分鐘，賣飛嘅黃牛黨入場，竟然係坐響佢隔籬。黃牛黨若無其事，與鬼佬R談笑甚歡，知道佢來自香港之後，黃牛黨話：「我年年都去香港炒七人欖球賽嘅波飛，乘機賺番一筆，有三大好處：（一）可乘機到香港一遊，去蘭桂坊、灣仔狂飲；（二）來回機票、酒店食宿；（三）扣除（一）（二）兩項使費，最後重可以有一千鎊利潤㖭！」炒七人欖球賽波飛咁好賺，究竟門票從何而來？黃牛黨話：「容易到極，我空手入白刃，日日企喺大球場附近問人：我想睇波，請問有冇飛出讓。此係我入貨來源。撲到飛，我就去酒吧搵鬼佬同胞兜售，賺錢一啲都唔難！」
啲國際黃牛黨富有企業家精神，夠晒膽識。黃牛黨對鬼佬R話，佢每季在倫敦炒英超聯、足總盃各種波飛，一年淨賺四萬鎊，唔使報稅㖭，最麻煩就係碰到日本遊客，往往講價到開波之後先至肯買飛，要佢以十五鎊蝕讓啲二十鎊嘅球票！