長假在前，好友無心戀戰，恒指又跌57點。要搵好消息，暫時欠奉。過多5個交易日，就踏入4月份，每逢轉月份，啲輪都會濕滯少少，因為心理上窩輪壽命又短1個月。
中移動P輪3655：中移動（941）跌0.15元，拖低恒指9.5點。中移動成績表靚，派高息，市場已作反應，但相對於其他大隻股，仍然處於高位，如果再升番，亦好難撐得太耐，買C輪風險大，值博率低。要諗嘢做，可以打吓P輪主意，可選擇對象唔多，幾乎只係得隻3655。隻輪7月初到期，輪價15.7仙，溢價4.8%，槓桿率16.7倍（有效9.1倍），引伸波幅22.7%。正股派息0.46元，相等於股價1.8%，隻輪實際溢價，要減埋呢個數，所以唔算貴。
炒輪經常要幾手準備，中移動如果散得多，則掉轉槍頭喺低位做好嗰便，買C輪，對象係4571。
國壽P輪3706：國壽（2628）喺國企指數跌1.8%之下，只係唔見5仙。去年國內A股唔掂，國壽盤數唔靚得去邊，遲吓派成績表，跌多過升。買定P輪，對象係3706，6月下旬夠鐘，輪價34.5仙，溢價4.6%，槓桿率15.4倍（有效7.8倍），引伸波幅29%。
中信C輪4483：中信泰富（267）收23.50元，跌0.15元。等跌到23元，喺低位諗吓C輪買，對象係4483。隻輪係最多成交嘅標準C輪，10月到期，輪價24.8仙，負溢價0.6%，槓桿率9.5倍（有效6.9倍），引伸波幅21%。
國泰C輪：國泰（293）回落0.10元，收14.65元。合併或收購傳聞靜多一靜之後，股價陰番落去14元邊邊可能性大，C輪博唔過。做淡則唔得，因為冇P輪。
章盛