咪以為淨係球會先識得出埠搵錢，國家隊亦都一樣。英格蘭國家隊喺五月尾就會去美國，表面係集訓同埋打友賽，實際係賺錢至真。
英格蘭先喺五月三十一號喺新澤西對哥倫比亞，然後喺六月三號喺芝加哥對東道主美國；聽講英足總會喺呢兩場波執到二百萬鎊（約二千九百六十萬港紙），雖然比原先估計嘅少一半，但算係一筆幾可觀嘅收入。
查實英足總淨係同球衣贊助商份約都值成五千萬鎊（約七億四千一百萬港紙），加上同大型汽水廠、大型啤酒廠同大型連鎖快餐店係拍檔，所以唔單止唔窮，重分分鐘好有錢。
𠵱家佢哋為咗賺嗰少少錢，要班球員喺一個漫長球季後，再踢埋啲咁無謂嘅友賽，真係抵畀曼聯領隊費格遜同埋阿仙奴領隊雲格鬧。咁都未算，如果班主力好似李奧費迪南、碧咸同奧雲喺呢次美國之旅受傷，到時真係因小失大囉！
李察士掛靴嘥料
先排熱刺中堅李察士懷疑個腦生癌，經檢查後證實虛驚一場；但係，呢個有「藍領蘇甘保」之稱嘅球員，最終亦因成日頭暈頭痛，被迫喺前日正式掛靴。查實佢得三十歲，又曾經係英超聯其中一個高身價後衞（○一年喺修咸頓以八百一十萬鎊過檔熱刺），我求大俠都戥佢可惜。
德丁組仔媲美拜仁
德國足總話過任何球會贏十次或以上頂級聯賽冠軍，就可以喺件波衫上印三粒星；五次或以上兩粒；三次或以上就一粒。雖則BFC德累斯頓呢支前東德勁旅，𠵱家淪落到德丁聯比賽，但因為攞過十次東德甲組聯賽冠軍，於是可以同德甲班霸拜仁慕尼黑平起平坐，着三粒星球衣比賽。
亨利喊走博增兵？
法國前鋒亨利一直對阿仙奴好忠心，有強隊向佢招手都不為所動，但阿仙奴今屆表現麻麻，喺歐冠盃提早出局，所以佢開始心淡，話再係咁，就會考慮離隊。亨利係阿仙奴嘅心肝寶貝，𠵱家佢開到口，睇怕佢哋都會喺今個夏天大破慳囊，買番幾個夠卡士嘅球員返嚟。
皇馬闖神州𢱑銀
中國傳媒話，西甲班霸皇家馬德里睇中中國球會國安，準備用三千萬人民幣，買對方三十至四十個巴仙嘅股份，但𠵱家重好初步，離成事重有一段距離。雖則皇馬買國安係向錢看，認為有利可圖，但話晒佢哋係超級大球會，如果真係可以合作，肯定有助發展中國嘅足運。