特首選舉大風暴，終於要勞煩到李嘉誠出山，提出做特首三大條件，就係人格要高尚、有管治能力，同埋要大公無私，保持到香港安定繁榮！
李嘉誠話：最重要嘅就係第一樣，即人格要高尚！而當撈曾就合晒咁嘅條件！不過李超人不愧走慣江湖，佢話重有其他人都有咁嘅條件㗎，不過現時想參選嘅，有啲人就冇喎！
咦，現時尚未有人正式報名參選，誠哥唔通未卜先知，知道喺當撈曾身邊，特別係行政會議之內，有啲內心好想「鍊」低曾蔭權，但把口就冇咁講嘅，呢啲人嘅人格，兩面三刀，好有問題？
講到人格高尚，喺香港地，有幾多個可以做得到「富貴於我如浮雲」嘅再世活佛吖？一句人格高尚，人人講得出，真正做得到嘅有幾多人？老共都識得話人民眼睛最雪亮。當前人格最有問題嘅現象，就係流行啪針篤背脊，有啲流料甚至話中方對當撈曾將國歌當口哨咁吹，認為係對國歌不敬，因此對當撈曾另有諗法，你話幾精彩呢！
有啲土共，一心認定曾蔭權係港英餘孽，點知礙於中方吹行雞，焗住要睇面色，不過就陽奉陰違，把口話支持，暗中就香蕉皮㩒釘鋪到密密麻麻，諗住未來兩年，大破壞、大對抗，一股反曾亂港、逢曾必反嘅惡勢力經已形成，岳飛夠人格高尚咯，咪又係俾秦檜勾結宋高宗，將佢毒殺風波亭。
喺中國歷史上，人格愈高尚，下場愈悲涼，曾蔭權榮獲英廷冊封為爵士，佢嘅人格，當然高尚，不過，正所謂：殺人放火金腰帶，修橋整路冇屍骸！全港人格高尚嘅人士，醒定呀！
傳真︰2623-9278
電郵︰[email protected]