謝斐道五一五號總統餐廳，改名銅鑼坊，拍檔業主資深投資者黎永滔與羅家寶，趁市旺計劃復活節拆售。美記做獨家，重用高價，租用附近景隆街二號地舖做售樓處，毗鄰係全港舖王，呎租四千一百一十八。
美記黃子華話，個舖二百呎，呎租超過千二，因只租十日，至肯畀咁高租。點解要去到隔籬街開售樓處？佢話，銅鑼坊附近冇合適吉舖，有嘅都係大面積，唔啱用。據了解，呢個舖位業主都係銅鑼坊班人。
銅鑼坊共分為一百四十二個舖，每個四十幾至二百呎，平均呎價兩萬，最貴賣五百零萬。黃子華強調，銀行估到十足價，借七成；業主重提供兩年、每年七厘回報保證。估計全部賣晒可以套現三億。黎永滔等以五千九百萬買入總統餐廳，若果可以賣到三億，勁賺兩億幾。
近排發展商推盤緩慢，唔係好捨得賣咗手上嘅單位，悶局一場。盈大嘅豪宅盤薄扶林貝沙灣南灣，消息人士話，原本打算復活節檔期賣嘅第五座，稍為押後到下個月。
盈大顏金施（圖二）噚日話，第八座全幢一百零五個單位，已經賣清光，套現十二億，呎價一萬至一萬一千蚊。𠵱家剩番第六座約二十伙。顏金施強調，加息未對豪宅盤構成影響，反為加快買家入市決定。
中原李巍話，今個月，貝沙灣有三十一宗一手成交，二手二十三宗。
配合貝沙灣將有新一輪銷售，利嘉閣噚日喺碧瑤灣，開咗個展銷廳，作銷售部署。
地產代理過去兩年大豐收，連發展商都話要成立物業代理部門。
信和物業管理杜日生話，下個月開始做物業代理業務，為旗下業主提供租售服務，初步計劃請十人，但唔會開地舖，只喺集團商廈內經營。信和管理物業一百五十六項，逾四萬千七伙。
對於信和做埋代理，中記施永青話，代理係好難做嘅生意，唔擔心信和競爭。美記陳坤興持開放態度，暫時未見影響。
信和噚日將清潔、管理、保安同停車場管理部門搬入九龍灣宏天廣場，呢四個部門共有五千幾人，今年會請多六百人，薪金會比舊年高半成至一成。杜日生話，除咗信和持有同發展嘅物業，管理物業組合中，有一成半屬於承接「街外」嘅合約。
中原（中國）宣布推出中原（中國）領先指數，係一系列全國各大城市嘅房地產指數，包括一、二手住宅價格同寫字樓租金指數。
率先推出係中原（上海）領先指數，之後會有深圳、廣州、北京、天津同杭州等指數。
中原中國程澐講解，中原上海領先指數，係反映上海二手住宅價格走勢，包羅全市二百零二個中高檔二手樓盤、逾八百宗成交。
以舊年五月一百點做基準，至今年二月，指數係一百二十六點，升勢重有加快迹象。
電郵地址：[email protected]