由星皓電影公司製作、八大影帝任達華、梁家輝、曾志偉、劉燁、陳松勇、黃秋生、柯俊雄同方中信主演嘅電影《阿嫂》，早排招募女主角，經多番遴選，終於喺中、港、台三地嘅試鏡者中，搵咗嚟自台灣、現年二十三歲、貌似2R成員Race嘅劉心悠。
導演黃精甫、監製鄭丹瑞、任達華同劉心悠噚日去咗灣仔出席《阿嫂》記者會，任達華話有睇過劉心悠嘅試鏡片段，覺得佢冰雪聰明，演戲自然，畀佢九十分，又話佢有能力直追張栢芝，重叫佢好好把握同八大影帝合作嘅機會㖭。
劉心悠𠵱家就搏晒命學演戲同廣東話，佢以國語話：「我在台灣拍過廣告，參加了試鏡，過程中導演要求我用多個不同方式表達一場慘情戲，起初我也哭不出來。今次與八大影帝合作，心情很緊張，我一定會努力演好角色。」
李麗珍噚日本來應承出席中環麗嘉酒店舉行嘅新浪網廣告頒獎典禮，但馮仁昭去到會場時，聽到話珍妹因病入咗醫院，所以嚟唔到。後來問番珍妹嘅經理人，先至知道珍妹其實係眼角膜發炎，前晚入咗養和醫院睇醫生後已經出院，𠵱家冇乜大礙。
劉浩龍噚日以頒獎嘉賓身份出席網絡大獎頒獎禮，提到有報道話佢嘅緋聞女友鄭融因行為不檢而俾公司雪藏，劉浩龍話喺簽約時已知會公司，自己有吸煙嘅習慣，佢話：「我都有同公司講，唔好搵我做反吸煙大使，我唔想好似呃人咁，不過我已經打算戒煙。」
譚詠麟（阿倫）噚日去咗港台做訪問，問佢有冇睇過鍾鎮濤前妻章小蕙主演嘅電影《桃色》，阿倫話：「我冇睇過，隨緣啦。」講到有傳有女星整容，問阿倫有冇留意有啲女星身材有反地心吸力，佢話：「我唔敢望，我介意身邊女人整容。我整過棚牙，都算有整過。」
楊凡噚日發咗張聲明去各大報館，話前幾日章小蕙講關於《桃色》部片喺內地有翻版，內容提到楊凡對翻版嘅睇法，裏頭用咗「十分高興」嘅字眼。楊凡喺聲明度話對翻版係「深惡痛絕」，從來冇買過，又希望政府可重視翻版同非法下載問題。
成立二十五周年嘅R.E.M.早幾日喺香港開騷，之前幾位成員接受本地傳媒訪問，同接受唱片公司頒發白金唱片。成員MikeMills話佢哋十年前嚟過香港，但因時間趕而冇機會周圍去，所以今次想四圍行吓。佢哋又話新碟會同唔同音樂人合作，創作更多好歌。
《雪狼湖》下個月喺香港公演，許慧欣落實會參與其中幾晚嘅演出，飾演阿雪。日前佢已經嚟咗香港綵排，馮仁昭知道許慧欣啲廣東話唔係咁好，背台詞係有啲難度，所以佢惟有將勤補拙啦，不過跳舞對佢嚟講就肯定冇問題，因為佢有跳舞底子。
