【本報訊】「我同佢講：『你冇煙食出聲，我畀你，真係攞都唔好攞晒。我煙癮大，揸車無煙食會撞車㗎，下次再偷就報警拉你！』」一名運送豆腐貨車司機，近日到慈雲山中心街市送豆腐時，多次被人偷走車內香煙，曾當場擒獲一名偷香煙老翁，警告後放行。豈料偷煙老翁昨晨又明知故犯，司機忍無可忍決定報警將他拘捕懲戒。 記者：伍浦鋒
多番被偷香煙事主姓何（三十餘歲），街市檔主稱他「豆腐強」。「豆腐強」每日清晨六時許，駕駛貨車運送豆腐到慈雲山中心地下一個街市，習慣將貨車停泊街市外上落貨區，拔走車匙後將豆腐送入街市內多個檔口，日日如是。
近日「豆腐強」多次到街市運送豆腐後，均發覺放在車頭的香煙不翼而飛，「我車頭冇乜貴重嘢，只係放包香煙方便攞嚟食，所以習慣唔會鎖車門，估唔到煙仔都有人偷！」
「豆腐強」對於香煙多次被人偷去憤憤不平，決定查個明白，日前曾經假裝如常運送豆腐入街市但隨即折返，結果「一擊即中」當場擒獲一名偷煙老翁。他警告對方：「你冇煙食出聲，我畀你，真係攞都唔好攞晒。我煙癮大，揸車無煙食會撞車㗎，下次再偷就報警拉你！」由於見對方年事已高，香煙又不值錢，所以當時沒有報警。
至昨晨六時許，「豆腐強」如常到慈雲山中心街市送豆腐後返回貨車時，發現車內一包香煙不翼而飛，懷疑為同一名老翁所為，心感不忿四處查看，隨即在附近發現該名老翁。
「我問佢點解又偷煙，話要搜佢身，結果佢自己攞番包煙出嚟，我忍無可忍決定報警懲戒佢。」警員到場將涉案姓洪（七十七歲）老翁帶署調查，列作「偷竊案」處理。