八達通由香港威到海外，真係香港人嘅驕傲。八方噚日同八達通高層戴勇牧以及鄭韓菊芳食晏，聽到戴生下個月會去荷蘭開董事會，先知原來由前年開始，八達通已經為荷蘭開展電子票務系統，搞咗兩年，終於正式試用。
香港嘅八達通系統真係好掂同方便，搭車、買報紙、買嘢食、買餸、泊車都用得，所以成日有人取經。
問戴生返深圳搭地鐵幾時可以用？佢話重有細節要傾，始終大陸唔同香港，起碼要成年時間；至於過海隧道亦諗緊，因為要直接向顧客收取服務費，對八達通嚟講，係新嘗試，以往佢哋都係同公司收錢。你話如果每程車過海收五毫子服務費貴唔貴，八方真係要計吓數。
香港人用八達通已經好普遍，有成一千二百萬張喺市面流通，鄭太就話其實一人一張就夠，因為可以增值，毋須浪費。原來八達通只係需要用零點三秒就完成交易，真係啱乜都要快嘅香港人。
傳真︰2623-9278
電郵︰[email protected]