由老董一手搞起嘅香港影視娛樂博覽噚日開幕，佢老人家梗係冇得露面。影視明星如發仔、張曼玉、梁朝偉同汪明荃幾乎全部都嚟齊，署理行政長官曾蔭權亦親自帶隊，同埋民政事務局局長何志平、工商及科技局局長曾俊華一齊到場，真係星光熠熠。
由於今次貿發局都有份協辦，所以主席吳光正都有出現，重同當年提名佢參選第一屆特首選舉嘅擁躉汪明荃合照。
至於煲呔就鬼咁風騷，既引差利卓別靈嘅名言，又引作曲家爾文柏林嘅描述，大擦影視界鞋，話佢哋既帶來藝術，亦帶來可觀嘅收益，一年合共高達五十億。最後佢以木匠樂隊一首"We'veonlyjustbegun"（我們才剛開始）作結，叫大家繼續努力。煲呔語帶雙關，講埋畀自己聽。
傳真︰2623-9278
電郵︰[email protected]