二五鬧劇，愈演愈騎呢，連唐唐都宣布「咪搞」，罔顧媽咪感受，毅然話唔參加特首「選舉」。
梗係喇，壽爺澳門親切會見當撈，揸扒六秒黃金大欽點，初頭以為做穩兩屆十年，原來只得「試用」兩年！壽爺當日在澳門，眼尾都冇乜點「臘」唐唐，淨係顧住同當撈四目交投，咁唐唐又豈有咁大膽，想挑戰當撈，咁咪即是變咗反中抗壽，同胡溫新政對着幹？
加埋賭王何出晒聲，叫人唔好參選搞破壞！呢句說話，當然係射向只值八十八分嘅唐唐嘞！點解賭王對唐唐咁深仇大恨？唐唐就要問吓佢老死田少嘞！田少話要喺大嶼山起賭場，擺明同澳門爭客，唐唐竟然附和，話要「研究」，咁你話又點唔輪到當撈今次隻手遮天吖？
民主派又想參「選」，話要迫當撈提出「政綱」，則係純屬低B，正好予土共民建聯挑撥之機！陳鑑林代表民建聯話會集夠一百票提名李柱銘參「選」，不過提名唔等於到時會「選」佢，咁即是擺明搗亂，想推阿馬丁入去，等馬丁同當撈隻抽肉搏，成班土共就睇戲嘞！
爵士只不過係公務員，從來冇從過政，何來「政綱」？現身國際欖球賽場合，優先接受鬼佬傳媒訪問，嗱，呢樣就係政綱，唔通咁你馬丁同劉慧卿會反對？民主派玩嘢，咪盞激到當撈第日又同土共行埋，好似廢董八年咁，個個禮拜同啲土共愛國社團、左校剪綵，咪卒之將個特首辦，搬去土共根據地嘅北角！
不過，就算當撈點做嘢，都係冇用！嗱，呢兩日開始有人講，聲稱《基本法》規定，特首只准「連任一次」，咁當撈今次「選」完，最多兩年後只准「選」多一次，咁就算係「連任」完畢，換言之，有人摑何鴻燊一巴，喝定先：煲呔唔准做十二年，亦無緣做十年，最多最多，只係七年！即是話喺佢眼中，呢兩年又係當「一屆」咯喎！
廢董攬啜土共，咁又點？咪一聲「跟佢只有辱，沒有榮」，慘遭拋棄？天真爛漫嘅唐唐都想玩？第日輪到佢受人玩弄，咪盞唐媽媽肉痛。
傳真︰2623-9278
電郵︰[email protected]