近日被傳同男友三宅健開始同居生活嘅日本女歌手安室奈美惠，正忙於宣傳新細碟，可謂事業愛情兩得意。
下月六日推出新細碟《WANTME,WANTME》嘅安室近日落力宣傳，佢最近為新一期日本時裝雜誌《SCawaii》做封面女郎，又接受咗雜誌訪問。原來近日已為人母的安室同唔少香港師奶一樣勁迷韓劇，佢話自己近日狂追睇正喺日本播出嘅韓劇《天國的階梯》，重成為咗「誠俊哥」權相佑嘅fans，每星期絕對唔會錯過。
另外，前日安室以神秘嘉賓身份出席喺東京國際Forum舉行嘅「神戶collection2005」活動，不過安室並唔係行catwalk，而係擔任時裝騷嘅表演嘉賓。
當日時裝騷接近尾聲時，安室喺事前無任何通知下突然現身台上，令到唔少觀眾非常驚訝。而身為日本潮流教祖嘅安室，當日就着住白色小背心同粉紅色迷你裙，配啡色長靴，喺台上同舞蹈員又唱又跳。雖然當日安室只係唱咗一首新歌，但已經令全場二千幾名觀眾瘋狂。