球隊受到傷兵影響絕對唔出奇，好似利物浦咁踢完默西塞德打吡戰之後，又「收」咗幾個球員，真係連我求大俠都替「紅軍」同佢啲擁躉唔抵，重影響埋之後備戰歐冠盃。
有睇呢場波嘅球迷都知，禾諾克、夏文、摩連迪斯先後因傷退下火線，巴路士又唔生性攞紅牌，如無意外要停賽三場，而路斯加西亞同埋利斯，賽後都報稱腳踭受傷，而呢批新傷兵預計最少休息兩、三星期，加埋本身好似施斯、基維爾同基克蘭等傷兵，多到連我哋「蘋果波經」賽績嗰欄傷兵名單都唔夠位擺，足足夠一隊波，睇嚟歐冠盃八強時，有多一個同阿朗素一齊復出已經算好彩。
除咗「紅軍」外，國際米蘭嘅阿祖安奴日前聯賽亦受傷，預計養傷一個月，歐冠盃冇咗佢，文仙尼都幾頭痕！
占士大帝都算架勢
勒邦占士周日再次「嚟料」，響作客輸畀速龍一仗攻入五十六分，成為史上最年輕攻入五十分或以上嘅球員。賽後速龍嘅馬素爾將佢同佐敦相提並論，話舊時贏公牛都係「放棄」佐敦而嘜住其他人；今仗諗住守唔到占士，所以重施故技。嘩，二十歲就俾人當係佐敦，犀利！
朗拿度醒目即道歉
朗拿度前晚對馬拉加場波表現唔好，被換出場果陣畀球迷狂「噓」兼畀執波仔「寸」。朗拿度㷫起上來，執起塑膠水樽飛埋觀眾席度。事後，佢向球迷道歉，話當時聽到有人問候佢娘親，所以一時衝動啫。我求大俠知道朗拿度一向係孝順仔，不過飛樽點都係唔啱嘅，下次唔好喇！
抵車仔喺英超風騷
車路士門將施亞話佢哋今屆打得咁好，係因隊波夠上下一心；聽講佢哋老細阿巴莫域治勤學英文，重同球迷一齊唱車仔打氣歌好似《BlueIsTheColour》同埋《BlueFlagFlyingHigh》㖭。車仔有個又出錢又出力嘅老細，呢個英超聯冠軍獎盃，睇怕都飛唔出佢哋五指山。
卡富阻舊隊友發達？
前晚AC對羅馬，倒戈嘅卡富下半場雙腳鏟波整傷古菲，令對方小腿有個血洞仔，動作認真礙眼，球證其實有權趕佢出場。卡富甚少踢茅波，唔知點解整腳咁杰畀前隊友歎。最慘係古菲本來有機會首次代表阿根廷正選上陣（周六作客玻利維亞），呢鋪真係多得舊隊友唔少囉。