財政司司長唐英年一如所料，噚日自己開口話一定唔會參加七月行政長官補選，唔使大家亂猜，咁北京都出晒口術叫煲呔上，唐唐都冇謂爭，不如退而求其次，等下屆好過，而煲呔一話選，佢重可以做一個月署理特首頂吓癮。
八方問曾經參加第一屆特首選舉嘅楊鐵樑點睇，佢話梗係多啲人出嚟選熱鬧啲，佢當年雖然輸咗畀老董，但係今日都好開心。唔講唔知，原來當日楊官參選特首，並冇好似今日咁清楚寫明一定要先退公職先可參選，只係佢自覺係司法人員去搞政治格格不入，所以當消息喺香港忽然通天，佢本來人在英國放假，亦急電回港向當時嘅署理大法官Power請辭。
八方問楊官點睇煲呔？佢笑話同煲呔只係工作來往，唔熟，所以唔好評論，況且佢𠵱家已經退晒休，生活優哉游哉，不問世事，平日就照顧吓太太，睇吓小說，教吓啲學生仔英文同禮儀，豈不快哉。
傳真︰2623-9278
電郵︰[email protected]