唐英年噚日再次為自己唔調整紅酒稅解畫，佢出席一個研討會時，馬會主席夏佳理話收到唔少商界意見，話旅遊業牙痛咁聲，認為香港紅酒稅偏高。
唐英年話，佢睇過香港最暢銷嘅紅酒，平均價只係賣五十五蚊支，最平嘅入口價只係低至四個三毫幾，言下之意，係話減稅都未必幫到好多。嘩，稅前嘅紅酒竟然可以平過支豉油，啲酒廊真係食水好深。
夏佳理見冇結果，最後套用鄧伯伯名言，希望馬照跑、有朝一日紅酒稅照減。之後重話，佢最近交咗份意見書畀政府，再重提全年都有馬跑嘅建議，佢話人哋澳門咁旺，香港就兩個月冇馬跑，唔係幾啱數。
夏主席梗係想政府快啲拍板，可惜𠵱家又話換特首，又有排等啦。講兩講，佢喺個袋攞咗條粉紅色嘅手帕出嚟抹面，八方哋一見到就轉話題，想問條手帕何來，夏主席馬上一個箭步走開，乜嘢問題都唔答。
傳真︰2623-9278
電郵︰[email protected]