圈中女藝人經營副業，知名度高啲自然就價錢高啲，正如海鮮中嘅蘇眉同紅衫魚咁，價錢都差一大截啦！但馮仁昭聽聞有位原本屬於中價海鮮嘅女藝人，佢自恃早排拍過電影，就將自己身價提高到貴過蘇眉嘅價錢，每做一次生意要收一百萬港紙，真正係獅子開大口，吊起嚟賣。
呢位女藝人其實已年近四張，但因為皮膚同身材保養得宜，兼且新聞是非多多，成日見報，所以佢未坐地起價之前，都算係生意興隆；但佢自從叫價一百萬之後，就一直有價冇市，直至近日，終於有位內地富商肯出價，點知呢位女藝人貪得無厭，諗住嗰位內地富商出手闊綽，就臨時加價要多幾十萬要埋佢舖頭啲貨，富商梗係睬佢都儍，即刻走夾唔唞啦！貪字得個貧，咪就係咁解囉！
李思蓓早前為擔任代言人嘅專業纖體美容有限公司拍攝纖體廣告，重分別以唔同嘅性感造型影相，大晒34D、23、33嘅美好身段。李思蓓話佢以前唔識得做啱自己嘅運動保持體形，但𠵱家有導師教佢做機纖體同埋做健身，佢終於一雪前恥，身材有番線條，成個人弗晒喎。
陳豪噚日喺將軍澳電視廣播城為拍攝《胭脂水粉》煞科戲，佢話下個月就要開拍新劇《黃土大地》，喺套劇入面由於要成日赤裸上身，所以𠵱家陳豪一得閒就去健身，希望到時可以展示一身肌肉，佢話：「我好耐冇做運動，操得幾多得幾多喇。」
林建明噚日出席一個關注老人睡眠嘅活動，原來沙姐之前患抑鬱焦慮症嘅時候，同時間患有渴睡症，佢話：「當時我可以四日四夜唔起身，一次過可以瞓二十個鐘，𠵱家都好番好多。」另外，記者問到藍潔瑛嘅近況，沙姐話：「之前太忙都冇時間聽佢電話，遲啲我會搵佢傾吓偈，其實佢知道乜嘢可以醫到佢，但係佢唔乖，又多自己見解唔願睇醫生。」
董敏莉（Monie）噚日以美白大使身份去尖沙嘴出席一個護膚品牌嘅宣傳活動，之前有傳話佢公司要雪藏鄭融，所以將呢個工作畀咗Monie做，Monie話：「唔知呀！呢個廣告係前個月接嘅，我亦唔覺得鄭融俾公司雪藏，因為我都係啱啱先喺外地返嚟，好耐冇見佢。如果佢𠵱家冇乜嘢做，可以休息吓，再出嚟狀態重好啦！」
陳奕迅（Eason）噚日去文化中心綵排IFPI頒獎禮，佢會負責演繹《大丈夫》同《問我》兩首歌向黃霑致敬。Eason喺接受訪問時話到最近睇一個籌款節目時覺得毫無娛樂性，所以佢覺得做歌手嘅要做好自己嘅本份。另外，大會重邀請咗溫拿拍攝《霑叔》一曲MV，據知梅艷芳生前最後一個演唱會嘅大碟亦都獲得銷量獎項。
