上周五美股收市前好番，埋單杜指微升3點。本港銀行加息，估計遲吓再加。港股暫時好難有作為，要做嘢，諗吓造淡嗰便，即係揸啲P輪。但如果個市跌得急，買P輪要畀高啲價錢，則唔做住，反而趁低價收多少C輪，博反彈。
恒指P輪3943：恒指P輪如果唔係升得急，買番啲。3943係長命輪，9月尾到期，輪價20仙，溢價4%，槓桿率11.3倍（有效7.1倍），引伸波幅19.4%。隻輪新簇簇，掛牌不過3日，已有好大成交，上周五達444球，肯定係日後炒家炒上炒落熱門對象。
恒指P輪4516亦係熱門貨，輪價5仙，溢價0.6%，槓桿率55.3倍（有效37.3倍），賭味好重，唔係一般人啱炒，因為明日最後交易。
中企P輪3580：國企指數因為個別成份股掂檔而高企，𠵱家4957，偏高啲，吼中企指數P輪短炒，對象係3580，5月底夠鐘，輪價10.3仙，溢價3.4%，槓桿率12倍（有效8.3倍），引伸波幅25.3%。
新地P輪3678：新地（016）近排好強，有業績撐住，但大市氣氛麻麻，短炒，搵啲P輪埋手，博正股跟大市回吐些少，對象係3678，6月尾到期，輪價38仙，溢價4%，槓桿率19.2倍（有效9.5倍），引伸波幅23.1%。新地獲芬佬睇好，揸P輪要執生，唔對路止蝕走人。
中移動P輪3655：中移動（941）業績靚，捧場客多，股價若再升，短炒P輪，博正股回頭，對象係3655。正股派息相等於股價1.8%，P輪實際溢價要減呢條數。
章盛