立法會泛聯盟議員呂明華最近同董生一樣，獲中央增補為政協委員。八方覺得，雖然有咁嘅殊榮，呂明華都係一則以喜，一則以憂，事關出得嚟行，就預咗要還，而呂明華「要還」嘅日子，應該就喺今日。
補選特首咁大件事，立法會政制事務委員會今日就要開會傾清楚，選舉安排同涉及嘅種種問題，咁，又要辛苦身為政制事務委員會主席嘅呂明華，民主派同保皇黨肯定有排拗任期問題。呂明華過往好少做委員會主席，要鎮住咁大嘅場面，真係心有餘而力不足，好似上次民主派玩突襲，動議公投一事，呂明華就被左、中、右各方一致批評，會議經常超時，怨聲四起。
唔怪得上星期立法會拗到特首任期係兩年定五年，呂明華一彈起身，開宗明義話贊成人大釋法，爭在未講到出面，釋咗法，佢主持政制事務委員會時就唔使煩，但中央畀佢做政協，亦要物有所值，呂明華真係有苦自己知。
傳真︰2623-9278
電郵︰[email protected]