政制事務局局長林瑞麟近日為補選特首任期問題四出解話，不惜自摑一巴，以今日之我打倒昨日之我，林瑞麟今次表現如何，相信唔少人心中有數，八方聽聞連台灣方面都對佢有微言。
有台灣駐港人員私下講，舊年十月九份大車禍後，港府即時搵中華旅行社幫忙，包括辦手續安排親屬同港府人員到台，台方自然從速處理。
不過，事後香港方面卻似乎唔多識做，有台灣駐港人員稱，發生呢啲緊急事件，唔單止派駐香港嘅人員要做嘢，台灣有關當局配合都好重要，港府多謝都冇多句，的確令人感到有啲不是味兒。據了解，台灣駐港人員都深明林瑞麟為難之處，體諒佢做夾心人之苦，但只要台港不談政治，喺一般事務操作層面上應該可以做得好啲，唔好有事鍾無豔，無事夏迎春。
傳真︰2623-9278
電郵︰[email protected]