特區宮廷政變，表面風平浪靜，枱底波翻浪湧。特首選舉、行會改組、三司十一局去留，以至其他半官方機構大學醫院乜局物會等等委任人選勢必大執位，一件跟一件，音樂一起，爭位活動馬上開始。第一個位就係政務司司長。
煲呔曾上位，班政務官心情又喜又憂。雖然陳四萬人在英國未出過一句聲，但係識佢同煲呔嘅人都話，阿太已經忍咗煲呔咁多年，冇理由今次唔支持佢更上一層樓。反而佢哋𠵱家開始擔心係煲呔扶正之後，邊個做政務司司長。
早前，有「橋王」之稱嘅許仕仁忽然預先張揚話會東山復出，重話有三方面嘅人搵佢，一個係煲呔，一個係唐唐，重有一個係中央政府，咁就真係猛料。不過，啲人話許老爺講明只做兩年，唔會陪煲呔二加五，做其二五仔。
八方聽聞，許老爺已經開始熱身，最近重同啲舊同袍食飯飲茶，非常忙碌，甚至「發號施令」，叫大家要做好準備工作，一於帶班公僕殺回朝，取回失去八年嘅大好江山。
許仕仁今次瞓身救港，肯同煲呔拍住上，的確好偉大，上次老董被迫放棄梁錦松之後，聽講出動到任志剛請佢返去做財政司司長，佢死都唔答應，可見請佢出山實在唔易。
但係呢個世界始終有不同意見。有人就覺得老許食得太多茶禮，同郭家及商界千絲萬縷，反而佢哋認為孫明揚可以服眾，話晒孫公做咗咁耐公僕，又冇離開過政府，輪都輪到佢，你話領匯關唔關佢事？當然關，但係唔應該影響佢更上一層樓。
𠵱家重有成百幾日先至選新的特首，煲呔梗係唔表態，至於老許係咪真命天子就要到時先知，事實佢老人家嘅行動，外面好少人可以估得中。
傳真︰2623-9278
電郵︰[email protected]