老董雖然已經下馬，唔再係香港最高領導，但係以前挺董班老友，都未至於唔識人。八方聽聞，班港區政協委員諗緊同佢擺番幾圍，賀佢高票當選全國政協副主席，做咗國家領導人，辭任特首一事梗係唔講啦。
八方問一直挺董不遺餘力嘅政協常委陳永棋可有此事？棋哥馬上話佢自己唔係搞手，不過，佢又補充話，過一、兩個月時間等董生得閒啲，會同佢阿叔陳瑞球搵董生食餐飯，反正大家一場朋友，佢阿叔又識咗董生咁耐。
一兩個月？好彩老董唔使等開飯，否則會餓親。當然棋哥都好有感觸嘅，佢話當初聽到董生唔做都好愕然，雖然話佢身體唔好啫，但係董生真係無私地為香港好，所謂鞠躬盡瘁，佢預言董生離開之後，香港人會愈嚟愈發現董生好處喎。
咁就真係遲吓先知，正如溫總話，歷史會對老董有一個公正評價，大家姑且聽葉劉一次：放長雙眼睇吓。
傳真︰2623-9278
電郵︰[email protected]