四十歲的阿萍，經歷兩次破碎婚姻，背負三名年幼子女的養育重責，令她出現精神抑鬱症狀，需向精神科醫生求助。近日，一家四口獲房屋署恩恤安置，阿萍既喜且憂，擔心無法應付一筆龐大搬遷費。
「房屋署畀我哋間屋，雖然已經有二十幾年樓齡，不過如果今次唔要，就唔知再等到幾時，同埋𠵱家住呢度品流都好複雜，好想快啲搬。」阿萍說。
阿萍現獨力照顧三名現年六至十四歲的子女，一家靠綜援金過活。去年六月阿萍與第二任丈夫關係破裂，申請離婚，她與子女獲社會福利署社工協助搬遷，租住唐樓分租房間，並向房屋署申請恩恤安置，近日獲配市區舊型屋邨一個三百多呎單位。
「社署話上次已經幫咗我搬屋，今次冇得再幫，𠵱家新屋要交幾千蚊按金同埋第一個月租，我打算用今個月綜援金生活費交咗先，不過交完之後就冇晒錢食飯，重有其他雜費未計。」憔悴的阿萍彷徨地說。
蘋果日報慈善基金撥款六千元予阿萍，助她繳付搬屋所需按金及雜項開支。
捐款編號：C1654
暖流熱線
電話：29908688
傳真：23702192
電郵：[email protected]
網址： http://www.charity.atnext.com