樓市暢旺，單幢樓都成為搶手貨，北角天后廟道三十一號單幢新樓，短短三個零月內，兩度轉手，合共升值兩成幾。
天后廟道三十一號，由佳明控股喺今年一月，向發展商恒和珠寶全幢購入，作價一億七，揸咗唔夠三個月就賣出，勁賺三千八百萬。
原業主持貨期間，不斷有買家出價洽購，最終賣咗畀一個本地商家。個商家知道個盤多人爭，睇樓幾個鐘，就拍板入市，成交價近兩億一。
利記執董廖偉強話，全幢四十六伙，總樓面近四萬二千呎，呎價約五千。買家打算分拆出售，以嗰區新樓市價每呎七千蚊起計，賣晒至少賺一億。
幢樓喺○三年底樓市復甦初期，曾經招標，當時市道未明朗無人吼。事隔一年，情況唔同晒。
大角嘴奧海城商場，成為西九龍最多人行嘅場，尤其假日，人流多到搵嘢食都要排成粒鐘。旺到咁，自由行救港，似乎真係冇講錯，起碼租戶就一定咁諗。
個場旺，自然吸引更多唔同類型嘅活動搞手，好似就快上映嘅《挪亞方舟驚世啟示》紀錄片，選咗復活節黃金檔上畫，噚日搵嚟負責旁述嘅藝人鄧萃雯、鄭子誠等，喺奧海城搞宣傳活動，其中鄧萃雯啱啱又有套清宮電視片播緊，現場唔少師奶fans捧場。
明星效應幾時都收效，美記早排搞職業講座，除咗名人執董陳坤興主講，重加埋名導演兼茶餐廳老闆張堅庭，吸引過百市民捧場。張導演話，銷售與服務行業都可以用「戲劇人生」手法，代理要好似做戲咁，投入客人角色，了解佢哋心態、思想及背景，為客人提供更貼心服務，咁就事半功倍。
席上，陳董搬出成績嚟，佢話，美記舊年有八十八個年薪過百萬員工，其中十二個重超過五百萬㖭。
復活節就快到，各大商場宣傳活動離唔開復活蛋，好似觀塘apm，計劃搞蛋世界展，喺大堂展覽場，展出一百隻嚟自世界各地同本地創作人製作嘅人形蛋，重有十呎高人形巨蛋梳化。
至於恒基嘅商場，亦會有「復活笑蛋開心全接觸」活動，聯同各區幼稚園及小學，繪畫近千隻開心笑蛋，喺各場展示，主題係「畫出歡笑」同埋「祝福」。有小朋友用會笑嘅雪糕去表示快樂，充滿童真。復活節期間，喺場內買嘢，有機會獲取哈哈笑收音機，同埋搞笑漫畫書籤。
電郵地址：[email protected]