董太在《壹週刊》盡訴心中情，繼續成為中環熱門話題，而佢一句「董生重鐵過楊傳廣（圖）」，直接揭穿董建華以健康欠佳為由辭任特首係一個大話──鐵過鐵人楊傳廣，又點會有病？至於董太咁直率透露領導人身體狀況，算唔算洩露國家機密，就要人大釋法至知。
董生被迫講大話已係人都知，但楊傳廣係邊位就好多人問。楊傳廣係台灣阿美族原住民，在洛杉磯讀書，一九六○年參加羅馬奧運會，獲得十項全能賽銀牌，係中國人第一次攞奧運獎牌，威到盡。三年後，楊傳廣更以九一二一分創出十項全能世界紀錄，贏得亞洲鐵人稱號。
楊傳廣現居台灣，上周佢老家門口有棵樟樹被鄰居斬咗，仍獲媒體廣泛報道。至於董太點解係要揀個台灣人嚟做比喻，八方就真係唔知，可能董家當年同台灣有交情，對楊傳廣特別有好感啩。
傳真︰2623-9278
電郵︰[email protected]