噚日大嶼山有個「香港植樹日」活動，呢個活動嘅籌委會主席係董太，八方收到採訪邀請話董太到時會去主禮。唔少記者為咗睇吓董太係咪真係「打唔冧」，晨早流流、山長水遠撲入大嶼山搵董太，點知去到先發現佢老人家臨時甩底。有大會嘅人話，董太星期四已經請咗假，𠵱家去咗上海喎，所以唔會嚟。
雖然老董落咗台，但佢嘅高級助理陳建平原來繼續喺特首辦返工。特首辦發言人話，陳建平重有合約喺身，一日合約未完，佢一日都要返工，處理特首辦嘅事務，至於老董剩番三百幾日假期點處理，當局重研究緊。反正東方海外股價屢創新高，捐咗啲假期補錢出嚟，幫輕吓納稅人都好。
傳真︰2623-9278
電郵︰[email protected]