「一朝天子一朝臣」，特區有邊啲新臣？遲吓就知。「新人事新作風」，曾蔭權有乜新作風？一言以蔽之──就係「反董」。
「反董」當然唔係公開倒董，畀個西九天幕佢做膽都唔敢得罪國家領導人。不過，實際行動上就要同董事長作風相反。例如阿董拖泥帶水，我就手起刀落（最近準時委任李業廣做強積金主席）；阿董和稀泥，我就冇面畀（急召行會成員回港開會）；阿董匿埋我就高調（率領梁愛詩林瑞麟開記者會、重任人問）；阿董慢我就快（全速安排選舉）。
有北區區議員告知八方，話原本幫開佢手搞勞工經濟事務位EO忽然唔見咗人，原來上周初已被借調去選舉事務處，可見阿曾幾咁快手。八方聽聞，選舉事務處全速開動，已經有七八個人到位，佢哋見過鬼怕黑，所以今次盡量搵啲叻人。事關七月十號係死線，冇得改，未來一百日一個小錯都唔容許。哈，如果七月十號打風，你估點呢？
傳真︰2623-9278
電郵︰[email protected]