早排思捷（330）出完靚業績，股價炒到飛起，而I.T（999）上市亦出現認購熱潮，所以經紀黃話，即將在周三公布全年業績的零售股寶姿（589）不容忽視，一來業績估計唔錯，二來街貨主要由芬佬坐晒，貨源歸邊易挾高。
寶姿主要喺大陸經營自家品牌「Ports」，定位係以高檔名牌自居。有證券界人士引述公司所講，寶姿去年增加30間舖位，至今共有300間舖咁多，來年重會增加40至50間舖。此外，公司喺大陸搞嘅寶馬時尚產品零售店，聽講今年會錄得盈利。
由於寶姿行高級消費路線，加上成本控制得好，所以毛利較一般同行為高。證券界估計寶姿去年業績增長，點都會有雙位收字。
寶姿貨源歸邊其實有迹可尋，單睇公開資料，就可以發現有個星洲基金同歐資基金坐咗好多貨，由去年到𠵱家，完全見唔到佢哋有沽貨行動，反映啲基金真係睇得好長線。
寶姿上周五升0.92％，收5.45元，原來已經係52周高位。
慕容小初