陳柏霖、梁洛施、彭氏兄弟、陳可辛同鄭丹瑞等前晚喺銅鑼灣出席《見鬼10》首映，除房祖名、鄭希怡、吳浩康等撐場之外，同期打對台嘅電影《AV》嘅導演同演員都嚟踩場，話就話約埋一齊睇戲，其實就係互相宣傳。
一班人見到《見鬼10》演員影大合照，於是Shine同周浚偉成班企埋側邊等，彭發同彭順就叫佢哋過嚟一齊嚟影，周浚偉話：「你哋影緊，我哋唔入得住。」彭發就話：「怕乜嘢，夾埋㗎啦，過嚟影啦。」咁坦白搞到全場大笑。彭氏兄弟見彭浩翔全程十指緊扣拖實AV女優天宮真奈美，就忍唔住話：「拍戲拍到咁，係咪真㗎？」
《見》片監製鄭丹瑞同陳可辛話今次首映差啲要取消，因為條片喺泰國做後期沖片，唔知點解花咗，畫面好灰，佢哋洗咗七萬蚊做咗七個copy都一樣，𠵱家補救緊，希望周四上畫時冇事，但前晚就入戲院解釋畀啲觀眾聽，話如果唔滿意，可以畀正場飛佢哋再睇過，有觀眾好大聲話：「今日真係見鬼，你哋都幾識宣傳。」
另外，拍完呢套戲重有緋聞傳出嚟，梁洛施因為呢套戲先後同陳柏霖、古宇傳緋聞，前晚佢同古宇互相讚對方，但就話同柏霖冇偈傾，不過馮仁昭收到風，佢同柏霖戀情係真嘅，古宇就純粹宣傳。
李玟嘅新英文專輯《EXPOSED》稍後推出，佢今次喺造型上突破以往尺度，着咗件火辣黑皮衣皮短褲，酥胸半露，擺出性感撩人姿勢，將新碟主題「Sexy、Spicy、Naughty」發揮得淋漓盡致，李玟話呢啲係佢做歌手以嚟、一直想表現畀歌迷睇嘅感覺，所以希望有一日可以將音樂同時尚造型結合喺碟內，單係造型都使咗幾十萬喎！
肥媽噚日喺佐敦道為佢任代言人嘅減肥公司舉行嘅活動做嘉賓，噚日有成八十多名肥仔肥女出席，平均都超過二百磅。肥媽話：「𠵱家做咗代言人全家都受惠，大家都減咗成個碼。」肥媽最後重同班肥人合照，總磅數計落有成萬五磅，準備用嚟挑戰健力士世界紀錄。
李燦森同鄭中基噚日喺大潭水塘道嘅水務署高級職員宿舍拍《龍咁威2》，佢哋重以一身六十年代嘅吊腳褲打扮拍戲，鄭中基話：「呢場戲講我哋去飲，即係飲樣囉！」之前有周刊話佢喺腋下紋緋聞女友蔡卓妍嘅名，鄭中基即時收起笑臉話唔回應。問佢會唔會畀人睇吓腋下澄清傳聞，鄭中基話：「唔通下次話我第二度有紋身，我又要攞畀人睇咩！」
洪朝豐早年患上抑鬱症闊別香港娛樂圈，舊年去咗美國工作，𠵱家佢捲土重來返香港發展，噚日佢正式加盟互動電視，主持談情說性嘅節目，見到洪朝豐講嘢有紋有路，睇嚟佢個病都好得七七八八，講到佢已故舊愛寶詠琴，洪朝豐話：「我好懷念佢。」馮仁昭覺得只要一個人能夠睇開一啲，人都輕鬆啲、病痛都少啲。
