七人欖球賽舉行期間，酒店生意好到極，可以講話一房難求，老牌經紀G來港參加第一波士頓投資會議，幾乎冇房，佢話好彩大哥W面子夠，代佢打幾個電話，先至可以搶到一間五星酒店房間。
酒店入住率高，自然笑逐顏開。酒店收入來源有兩大部份，一係房租，二係餐飲，兩者加埋佔酒店總收入超過八成，剩餘嘅收入來自其他服務費（電話、傳真、商業中心、洗衣等等雜項），香港嘅酒店在餐飲方面特別好景，佔總收入四至五成，其他地方嘅酒店，例如曼谷，餐飲收入大概只係總收入三至四成左右，箇中原因好簡單，香港人有錢，到酒店開餐如家常便飯。
呢日食飯之時，酒店M同獵頭K講：「酒店房間內嘅『水吧』（MiniBar）本來利錢優厚，但現在愈來愈少客人開MiniBar攞汽水啤酒飲咯。」獵頭A話：「鬼咩，全世界的酒店都當MiniBar係搖錢樹，一罐可樂收三十皮，點飲呀。唔開到公數嘅，我一定唔飲。幾年前我出差去曼谷，因一時口渴，飲咗兩罐，點知返到嚟就俾會計部向我老闆篤，話我大使，俾老闆警告。」酒店M話：「呢樣我哋都察覺到，MiniBar好多時得個擺字，完全冇生意，可能真係好多公司都嚴格控制僱員嘅出差開支，行政人員唔敢做大花筒。」
獵頭A曾經幫某大公司挖到一位高層人員C。高層C返工後，不停飛，某次去到三藩市，入住酒店，已經好攰，於是叫roomsevice，返到香港後兩個星期，頭頂上司董事Y召見，對高層C講：「大老闆收到通知，話你住酒店竟然扮大爺，唔出街食飯，竟然叫roomsevice，你唔知到係零舍貴啲嘅咩。大老闆叫我勸告你，再有一次就發警告！」高層C出咗一身冷汗，估唔到有資格競選做特首嘅大老闆居然睇單睇得咁細微也。