日本動畫大師宮崎駿嘅《哈爾移動城堡》喺日本做咗九個禮拜賣座冠軍，喺萬眾期待之下，本周四正式喺香港上映。片中除咗由木村拓哉配音嘅魔法師哈爾以及由美少女被詛咒成老婆婆嘅女主角蘇菲最矚目之外，片中出現嘅卡西火、狗仔小軒同稻草人等古怪角色，亦迷倒唔少日本觀眾，人氣絕對唔比兩位主角差。
以往宮崎駿動畫嘅角色，如《龍貓》嘅貓巴士、煤炭屎鬼等都好受歡迎，而喺《哈》片入面亦不乏令觀眾一見鍾情嘅角色，例如有「火之惡魔」之稱嘅卡西火，雖然火仔細細，不過就係整座移動城堡嘅力量之源，但係卡西火性格多口、怕潮濕、鍾意食木頭，又經常抱怨俾哈爾用到盡，因為佢表情多多又可愛，所以有關佢嘅毛公仔以及精品，係片中角色中最多，絕對不容忽視。
而年紀唔細嘅長毛狗小軒，最過癮在於佢全身長如地拖嘅毛毛，以佢造型推出嘅半米長毛毛公仔更一早賣清光，非常厲害。另一個出位角色稻草人，擁有一個用蘿蔔造嘅頭，又經常玩倒豎葱，非常搞笑，佢嘅毛公仔同電話繩等精品，亦大受女fans歡迎。