八方讀書時讀過有種自然現象叫海市蜃樓，原來佢有個兄弟叫「海滋」。最近網上流傳一張聲稱喺香港山頂拍攝到嘅海滋現象照片。相中嘅維港上空出現咗上環幾座大樓嘅影像，十足十海市蜃樓一樣。據網友話，海滋同海市蜃樓都係折射景物嘅現象，不過海市蜃樓通常稍縱即逝，海滋就可以持續耐一啲。另外，海滋只會出現喺海島，並且只反映島上景象，唔似得海市蜃樓，景象可以經過空氣層傳遞到萬里以外，例如喺沙漠上空見到倫敦景色咁神奇。
八方噚日問過天文台，佢哋話都係第一次聽過海滋呢個名稱，當值天文台主任即時翻查資料之後話，原來凡喺平靜嘅海面，遇上適合嘅天氣都有可能出現海滋現象，但就好難講香港究竟有冇發生過，張相係真定係假，更加求證唔到。
張相咁特別，八方不妨刊登出嚟畀大家睇睇，希望各位對氣象或者攝影有認識嘅高人研究同指點一吓。
傳真︰2623-9278
電郵︰[email protected]