湯家驊近日好緊張，佢話俾人以為係自己周圍放風會參選特首，其實十劃未有一撇，泛民主派都未傾定人選。同時間，泛民主派傳出有意參選嘅，都係現任立法會議員，例如劉慧卿、李柱銘、李永達、梁家傑同湯家驊。
原來行政長官選舉條例嘅規定好特別，只係訂明公職人員，例如司、局長等唔可以參選，一係就要喺參選前辭職，但議員就可以喺當選之後先辭議員一職。咁即係話，當官嘅參選有風險，議員參選特首反而冇損失。
例如政務司司長曾蔭權，要參選就要喺六月提名前辭職，雖然人人話佢贏硬，連賭王何鴻燊都話買佢獨贏，但萬一輸咗，就連佢最鍾愛嘅官邸同魚池都白白輸埋，因為贏咗雖然都要放棄官邸，讓畀下任政務司司長，但畢竟會有新特首官邸做補償。
又好似楊鐵樑咁，九六年為咗參選第一屆特首，放棄首席大法官嘅公職，連官邸都冇埋，事後證明佢只係陪跑，聽聞楊太對老公咁抵得諗，都頗有微言，今時今日好難搵到咁有勇氣嘅人。
傳真︰2623-9278
電郵︰[email protected]