最近做電視新聞嘅記者大執位，唔知係咪經濟好轉，跳槽機會都多咗，好多記者都蟬過別枝。好似有線咁，原來都撬咗亞記嘅陳寶寶過檔，實行冇執輸。
寶寶姐最出名嘅一仗，就係老董喺澳門俾胡主席訓完話之後，佢阿姐喺記者會，當面質問老董慚唔慚愧？結果搞到老董塊面燶晒，第二日重令到亞記老闆陳永棋大表不滿，對住傳媒炮轟亞記新聞部。得罪老董唔怕，但係得罪老闆就可大可小，搞到八方當時都有啲替佢擔心。
八方唔知寶寶姐係為乜原因炒咗陳永棋魷魚，但都希望佢轉新工後，一切工作順利，幫市民搵多啲好新聞啦！
傳真︰2623-9278
電郵︰[email protected]