香港七人欖球賽花絮

成棚保安想裸跑都難
由於今年欖球世界盃由國際欖總主辦，所以好多方面都同以往香港國際七人欖球賽唔同，其中現場保安人數就明顯比以前多，幾乎每五步就有一人駐守，每日六百個保安圍住大球場，睇來想睇裸跑嘅觀眾，今年會大失所望。另一方面，過去幾年都有商業機構現場派海綿欖球仔，但今年賽會為避免球迷將欖球仔拋出球場，所以亦加強管制，欖球仔只好暫時絕迹。

迷人女fans鬥搶鏡
昨日天公造美，大球場呢邊全日陽光普照，風和日麗，最開心莫過於一班朝早已到球場打氣嘅球迷們，咁好陽光自然飲得杯落。而呢類球迷中，原來可以劃分成兩類人，一類經過刻意打扮的搞鬼fans；另一類係用自己天賦本錢，穿起背心、短裙嘅迷人可愛女fans。一班搶鏡、一班養眼，攝記們真係有排忙。

畫眼靚過畫花臉
「畫花臉」是欖球賽不可或缺的項目，今年更一連開了兩檔，價錢由七十五蚊到一百四十蚊。圖中的小女孩，打破一向傳統，俾對眼同個嘴仔任人舞，夠晒可愛，盛惠百二蚊。

「傳奇」球手帶仔遊球場
三十六歲的斐濟「傳奇」球手兼隊長撒力非，在闊別香港三年後，再次代表斐濟參加世界盃，他帶埋一家大細，包括最細的四歲的兒子到大球場睇波。他昨日不用比賽的時候，就像慈父一樣拖着兒子到處走。

接受藥檢隊隊有份
運動最注重fairplay（公平競爭），四年一度的七人欖球世界盃更不能例外；國際欖總今年規定每支球隊抽查兩名球員接受藥檢。這工作由香港體院藥檢部負責，前傷殘運動員、現任體院藥檢職員黃志強（圖）昨日在大球場預備藥檢工作。