小蘋果迎新會超爆笑．勁蝦碌

05年小蘋果第一次迎新聚會，終於圓滿結束。當日以樂園人物麥當勞叔叔、滑嘟嘟、漢堡神偷和小飛飛分成四組比賽。賽前魔術表演已經帶起好玩氣氛，到正式比賽時，爆笑的蝦碌鏡頭不斷發生，雖然有少少混亂，不過大家都盡興而歸。開Party，最緊要開心，千祈唔好谷氣啊！

記者：小辣椒　攝影：街坊泉
鳴謝：麥當勞、新鴻基地產、智樂兒童遊樂場協會

派對前熱身

20個月B女芷蕾說話蚊滋咁細聲，但好清楚聽到佢叫小辣椒姐姐，SoSweet！

■小飛飛組的珈晞同詠嫣一坐低就玩氣球，好快就熟絡咗。

■等齊人開Party可以好耐，食番個免費漢堡餐邊食邊等就最好。

遊戲蝦碌大全

遊戲多得智樂提供道具及意念，分成踩高蹺取氣球、裝飾紙板及拖氣球共三個計分環節，用最少時間完成的一組就可勝出。個個參賽者為求快快取勝，變成忘東忘西，急得旁邊的人不停叫囂，最後才做番正確步驟，全程蝦碌鏡頭無數，非常爆笑。

■原本踩高蹺到達終點時，各參賽者需要拍一下計分紙，小辣椒才會按停計時器，凱宏卻忘了拍，大家忍不住催促他，因為會加時㗎！

■話明係計時比賽，不過大會都體諒麥當勞叔叔組的代表年紀較細，讓大人扶着他參賽，不過他的出現，明顯影響小飛飛組的士氣，行得都好慢。

■跑到終點用咗極速五秒，可惜思進忘記呢個遊戲叫拖氣球，唔係拖紙板啊！

■拖氣球時手要定，氣球才不會跌出圈外，但小飛飛組揀錯氣球，一路拖一路跌，搞到凱彤好論盡。

爭做小魔術師

平時生日會只會出動其中一款樂園人物——不倒翁，今次有幸請齊麥當勞叔叔、滑嘟嘟、漢堡神偷和小飛飛，結果個個小記者都爭着跟不倒翁拍照。不過最受小記者歡迎的，當然是爭做小魔術師。魔術表演共有三個，其中「解繩」要求小記者的參與度最高，帶來無窮歡笑。

■穿上魔術師服的煒林，在姐姐指導下變出一撮羽毛。

■珈晞同上上拎住一條紅領巾，究竟有乜用呢？

■原來紅領巾是用來綁着小飛飛組成員，誰能救救她？

■麥當勞姐姐抽出魔術棒便把結解開了，好神奇啊！

抽獎高潮迭起

因受場地所限，唔係人人有得玩遊戲，而且贏出的組別又只得一組，但抽獎就人人有份。麥當勞除咗贊助全場兒童餐外，重送出30份細獎（生日派對紀念品）、5份中獎（LEGO遊戲）和兩份大獎（一套四隻玻璃杯）。當叫出號碼時，大家都祈求抽中，隨着獎品愈來愈吸引，氣氛也愈高漲，心急的小記者愈逼愈埋，小辣椒差點變成扁辣椒呢！

■以兄弟姊妹為主要成員的滑嘟嘟組，以大比數勝出比賽，唔通兄弟同心，其利真係斷金？

■當派發緊30份細獎時，大家已經對中獎和大獎虎視眈眈。

■四隻玻璃杯已經斷貨無得賣，進添和另一位妹妹做咗大贏家。

■哪組裝飾紙板最靚？小辣椒認為麥當勞叔叔組應該減10秒作獎勵。

■因為時間關係，無暇送出優勝組別滑嘟嘟組的禮品。組員將會收到電話，安排領獎事宜。

麥當勞生日會

不知不覺，在麥當勞開生日會已經成為不少B仔B女甚至小學生的成長印記。麥當勞05年以麥當勞叔叔、滑嘟嘟、漢堡神偷及小飛飛等四個樂園人物做主題，派對主角喜歡哪個人物，布置便以此做主題。
只要花$300，便可以在麥當勞搞生日會，於個半小時內，享受十人份歡聚套餐，每套套餐均附送小王子或小公主氣球一個。現場還有麥當勞職員陪小朋友大玩魔術呢！詳情請向就近的麥當勞分店索取單張。