經常有人問我點去諗古仔，我通常都會答：「坐喺度諗吓，企喺度又諗吓！」但係唔知點解有人聽完我呢個咁無聊嘅答案會笑住話：「嘻嘻，咁得意嘅。」我唔排除佢極有可能係笑緊我或者係佢都係個好得意嘅人。當然呢個係一個好低層次嘅答案用嚟應付一啲低層次嘅問題。不過其實係有啲方法，首先你要了解你想講嘅故事係乜嘢類型，愛情片、鬼片、動作片。再進一步就要諗吓會唔會有其他方法去講一個相同嘅故事，例如用動作片去講一個愛情故事，或者用愛情片嘅包裝去講一個有特異功能嘅人。但係最重要嘅其實係觀察，想像力再加上大量嘅資料搜集。最近我就諗咗一個新古仔，裏面有我觀察得來嘅事實，有我幻想嘅情節，亦有部份係由報章得到嘅資料。
事實係三月六日，港龍航空公司上午八時正KA900航班，香港往北京，我同劉偉強要到北京做頭文字D嘅宣傳，商務艙內同機有五六個行政會議成員，有幾個人大代表嘅有錢佬，再加埋一班佢哋啲助手、兩個明星，我懷疑乘客內重有兩個狗仔隊，人物都算夠豐富。
資料部份係當天報章頭條「董建華辭職」，內文有多種不同預測。幻想部份係我意圖從每個不同政治人物的面部表情去猜測事實，了解背後動機。場景發生在三小時的機艙內，戲名叫《九霄驚魂》。坐喺度諗吓諗吓，都幾好睇喎。
當然呢部戲唔會拍得成，因為冇老闆會畀錢你拍，但係你試吓將整個處境改做一個豪門恩怨嘅故事，可能會拍得。