由南非民權領袖曼德拉（NelsonMandela）籌劃嘅「46664關注愛滋病音樂會」，前年十二月喺南非開普敦舉行第一屆，而第二屆音樂會就定於香港時間嘅今日凌晨喺佐治市舉行。有份參與演出嘅多個英美知名歌手，前日同曼德拉夫婦一齊出嚟見傳媒，包括擔任大會司儀嘅荷李活男星韋史密夫（WillSmith）同皇后樂隊（Queen）等。身為曼德拉愛滋病慈善基金大使嘅韋史密夫，今次原來係義務做司儀，而佢嘅太太珍達娉琪（JadePinkettSmith）重會同佢隊樂隊WickedWisdom演出㖭。
至於其他參與演出嘅人重有英國女歌手AnnieLennox、皇后樂隊、Indie.Arie同KatieMeula等，齊齊宣揚預防愛滋病嘅訊息。曼德拉重話特別將今個音樂會獻畀女士，因為女士患愛滋病嘅機會原來比男士高出六倍咁多，我羅拉聽完都嚇咗一跳。
由於今次演唱會粒粒巨星，所以公開發售嘅七千張門票一早賣清，不過大會好有心，留咗三千張門票派畀啲患病兒童同青少年。我羅拉知道個演唱會會喺好多個國家直播，而網民如果上網畀錢睇直播，啲錢重會全部撥捐基金㖭。
另一方面，皇后樂隊嘅BrianMay、RogerTaylor同BadCompany嘅PaulRodgers，喺記者會舉行當日齊齊去咗佐治市一間兒童福利中心，探望愛滋病病童，啲小朋友重一齊唱皇后樂隊嘅名作《WeWillRockYou》，其間Brian好感慨咁話：「我覺得南非政府做得唔夠，世上冇一個政府做得足夠，希望我哋可以幫到佢哋！」