鄭融前排被傳因為唔聽公司話，講粗口又煲煙，所以就入咗雪櫃，連公司本來幫佢接嘅護膚品廣告都畀咗同門嘅董敏莉。馮仁昭收到風，佢公司確係有少少不滿，不過今次只係小懲大戒，其實想順勢捧埋董敏莉啫。
雖然話雪藏鄭融講到似層層，但一個禮拜未夠，佢噚日咪又出席兩個活動，其中佢就去銅鑼灣食品公司宣傳雪條，重猛派畀途人試食，吸引咗幾十個歌迷嚟支持，不過佢全程個樣就笑得好尷尬，周身唔自在咁。
問到鄭融有關俾公司雪藏嘅事，佢就乜都話唔知，明明報道出咗嘅時候佢喺香港，但乜都話要同公司了解吓先可以答。對於話佢爆粗又煲煙，鄭融話：「總之我乜都冇做過，問心無愧，清者自清，但都會同公司了解全件事，然後先同大家交代。𠵱家公司只係叫我同大家講『多謝關心』。呢件事唔會帶畀我煩惱，因為我冇做過。」
至於俾人話拍拖影響工作，鄭融話：「私事還私事，工作還工作，我唔覺得影響到工作。」
周國賢噚日喺旺角出席「接觸周國賢接觸真音樂」活動，吸引過百fans圍觀，佢話其實旺角嘅行人專用區可以仿效日本咁。畀啲歌手搞吓街頭音樂會，同啲fans作近距離接觸，重可以促進香港嘅旅遊業。周國賢話：「之前我都想試一次，不過好似話要申請先得。」
伍詠薇噚日着住件低胸露背裝去尖沙嘴出席LeSpa記者會，伍姑娘真空上陣，但冇做到安全措施，佢坐喺梳化影相時，條肩帶滑咗落嚟，差啲就走光，不過好彩佢眼明手快拉番好，做完訪問即刻黐膠紙，佢同馮仁昭講今次好失策，唔黐好膠紙就出門口。伍姑娘幫間舖拍咗個硬照廣告，重有一年免費任做Spa，佢話做女人一定要花時間扮靚至得喎。
唐麗球噚日帶埋一歲半嘅囡囡吳紫禧出席喺奧海城舉行嘅「寰宇愛心千人親子凝聚奧海城」慈善活動，呢次嘅親子活動有成一千人參加，重希望可以打破健力士紀錄，唐麗球話：「我第一次帶個女出嚟，佢學嘢好快，𠵱家最鍾意係聽國歌。」
葉青霖近年積極參與義務工作，佢重聯同義務工作發展局屬下義工攝影隊，喺太古城中心舉行一連三日嘅「攝出愛與關懷」攝影展，從作品中帶出做義工嘅喜悅，順便招募新會員，葉青霖話：「我用三分一嘅時間做義工，老婆（廖安麗）都好支持。」
郭晉安噚日出席喺銅鑼灣舉行嘅「2005健康生活齊認識講座」，同市民分享健康心得，安仔表示一向有服食健康產品嘅習慣，加上有女友歐倩怡嘅湯水滋潤，所以縱使生活有幾顛倒，佢依然可以保持好健康嘅體魄。佢咁幸福，真係羨慕死馮仁昭。
